اختر فنادق ألباتروس

تقييمي لفندق الباتروس بالاس – الغردقة

رقم الغرفة: 2151 (Family Room)

كانت فترة إقامتي من 5/7 إلى 10/7، إلا أنني اضطررت إلى إنهاء إقامتي ومغادرة الفندق يوم 9/7، مع إلغاء آخر ليلة، نتيجة تكرار عدة مواقف غير احترافية
للأسف، كانت هذه الزيارة صدمة كبيرة بالنسبة لي، خاصة أنني من العملاء الدائمين (Repeater) لمجموعة Pickalbatros، وأقوم دائمًا بالحجز مباشرة عن طريق الكول سنتر، واخترت فنادق المجموعة على مدار سنوات لثقتي في مستوى الخدمة. وقد سبق لي الإقامة في أكثر من فندق تابع للمجموعة، وعلى رأسها وايت بيتش، وكانت جميع تجاربي السابقة تتسم بحسن الاستقبال، والاحترافية، والاحترام، والمساواة في معاملة جميع النزلاء، سواء كانوا مصريين أو أجانب.

الموقف الأول – 6 يوليو:
ثاني يوم من إقامتنا، بناتي التلاتة راحوا يقعدوا على سرير قدام البولين، لكن اللايف جارد منعهم وقال إن السراير دي للكبار بس، وطلب منهم يقعدوا على الشازلونج. البنات اتكسفوا جدًا وقعدوا كأنهم عملوا حاجة غلط.
اللي استغربته إن دي أول مرة يحصل معانا كده، مع إننا بننزل فنادق الباتروس بقالنا 6 سنين، وعمر حد منع الأطفال من الجلوس على السراير. والأغرب إن في نفس الوقت كان فيه أطفال تانيين قاعدين على سراير
تانية عادي جدًا ومحدش كلمهم.

الموقف الثاني – 8 يوليو:
واحنا واقفين عند الـPool Bar، كان فيه مجموعة شباب أجانب بيلعبوا بعنف جدًا في البول، بيرشوا مياه على كل اللي حواليهم وبيزعقوا بألفاظ غير لائقة.

فجأة العامل بص ليا وقال: “قولها مترشش ميه”، وكان يقصد طفلتي اللي عندها 6 سنين، رغم إنها كانت واقفة جنبي ومبتعملش أي حاجة.

قولتله إن بنتي مش هي اللي بترش، وإن الشباب اللي قدامه هم سبب الإزعاج، لكنه تجاهلهم تمامًا. والأسوأ إنهم أثناء كلامي معاه رشونا مياه تاني قدامه، وشافهم بنفسه، وبرضه متكلمش معاهم ولا قالهم أي حاجة.

اللي ضايقني مش مجرد الملاحظة، لكن إن اللوم اتوجه لطفلة صغيرة مع إنها معملتش أي حاجة، بينما مصدر الإزعاج الحقيقي اتساب من غير أي تدخل. غير أسلوب العامل ونظراته اللي كانت غير محترمة، وخلتنا نحس بإهانة.

بسبب الموقف ده، اضطرينا نسيب البول، واتنكد علينا اليوم كله، رغم إننا كنا رايحين
نستمتع بأجازتنا.
الموقف الثالث – 8 يوليو:
بعد اللي حصل عند الـPool Bar، سيبنا المكان وروحنا الأكوا بارك عشان نحاول نكمل يومنا بعيد عن أي مشاكل.

عند البول اللي عمقه 140 سم، طلبت زوجتي لايف جاكيت لبنتنا الصغيرة، لكن اللايف جارد رفض وقال إنه مش مقاسها. زوجتي أكدت له إنه مقاسها .لكنه فضل مصمم يرفض بدون أي سبب واضح. وبعد نقاش وافق يدينا اللايف جاكيت، وأول ما بنتنا لبسته طلع مقاسها بالظبط!

الموقف ده حسسنا بعدم التعاون، خاصة إننا كنا بنطلب حاجة مهمة لأمان طفلة صغيرة، وكان من الطبيعي يخلينا نجربه الأول بدل
الرفض والإصرار من غير سبب.
الموقف الرابع – 9 يوليو:

تاني يوم الصبح نزلنا بدري عشان نلاقي مكان نقعد فيه، لكن فوجئنا إن كل السراير محجوزة بالفوط. وشوفنا بنفسنا نزيلة أجنبية حاطة فوط على 3 سراير، والعامل هو اللي كان بيساعدها.

استغربنا جدًا لأن في لافتات مكتوب عليها “No Reservation”، ولما سألنا العامل إزاي الحجز ممنوع واللي بيحصل ده إيه، رد بكل بساطة: “عادي.. عندنا الحجز مسموح.”

الموقف ده خلانا نحس إن القواعد مش بتتطبق على كل الناس بنفس الطريقة، وإن اللي مكتوب في الفندق حاجة، واللي بيتطبق على أرض الواقع حاجة تانية
كمان من الحاجات اللي استغربناها، إن طول فترة إقامتنا ترولي المشروبات كان بيمر على الناس اللي حوالينا كلها ويعرض عليهم مشروبات، لكن عمره ما وقف عندنا ولا مرة، رغم إننا كنا قاعدين في نفس المكان زي باقي النزلاء.

بعد كل المواقف دي، روحت الإدارة مش عشان أطلب تعويض، لكن طلبت بكل احترام إني أكمل آخر ليلة في فندق تاني من نفس مجموعة الباتروس، عشان أعرف أكمل إجازتي أنا وأسرتي في جو أريح.

في البداية اتقابلت مع مديرين كانوا في قمة الذوق والاحترام، وسمعوا شكوتي وحاولوا يحتويوا الموقف، وده أشكرهم عليه.

لكن أول ما جه نائب المدير، اتغير أسلوب الكلام تمامًا. لما قولتله إننا حاسين إن فيه فرق في المعاملة، رد عليا: “هو كل جنسية تيجي تشتكي إن الجنسية التانية بتتعامل أفضل؟”، وبعدها قال: “لو عايزة تمشي عادي… هنرجعلك قيمة آخر ليلة.”

الكلام ده صدمني، لأني مكنتش رايح أسترد فلوسي ولا أسيب الفندق، أنا كنت بدور على حل يحافظ على إجازتنا.

وقالنا“الموظفين اللي مش متعلم هنعلمه.”، كان ردي: “يعني هيتعلموا على حسابنا؟ لو عندكم موظف محتاج تدريب فده شأن الفندق، لكن فين حقنا إحنا بعد اللي حصل؟”

إحنا دفعنا فلوس الإجازة دي عشان نستمتع بيها، مش عشان نكون جزء من تجربة بيتدرب فيها الموظفين على حساب راحتنا
واستمتاع ولاد.
:

في النهاية اضطرينا ناخد قرار عمره ما كان في خطتنا، وهو إننا نمشي من الفندق قبل معادنا بيوم. .

اوتيل مرتب وحلو كثير والخدمه جيده جدا

تنظيف الغرفه جيده واشكر الاستاذ محمد جمال علي الاهتمام انا اقيم ف عرفه و4125. 4126