ملعب الإسكندرية

احلا يوم بجد يوم ماتش مصر والارجنتين بس قدر الله وماشاء فعل شرفتونا يا ابطال مصر

هل كنت تعرف…إن جوّه أقدم استاد في مصر وأفريقيا — استاد الإسكندرية —
فيه مكان يخليك تحس إنك عدّيت بوابة الزمن.. ورجعت مية سنة لورا؟ ⏳⁉️
إزاي؟⁉️
👈تعالى أقولك…
جوه استاد الإسكندرية ..فيه جوهرة مخبية عن عيون كتير ..و هى المقصورة الملكية 👑
🏛المقصورة دي مش مجرد مكان جلوس…دي متحف مفتوح.. من أول خطوة عند المدخل ..
هيستقبلك.. إفريز معماري منقوش عليه الشعار الأوليمبي باللاتينية..كأن المكان بيعلن عن نفسه ..
🏛 المقصورة متقسمة على دورين:
▪️ الدور الأول: كان للملك وضيوفه من كبار الشخصيات.
▪️ الدور التاني : للملكة وضيفاتها من الأميرات والسيدات.
🏛وفيها جناحين:
▪️ جناح لأعضاء اللجنة الأوليمبية الدولية والمصرية ورؤساء الاتحادات الرياضية.
▪️ وجناح للوزراء، وأعضاء مجلس البلدية، والنبلاء، وكبار القضاة.
اتصممت بذوق أوروبي راقي ومتشبعة بزخارف دقيقة ..أبرزها الهلال والنجمة…رمز العلم المصري في زمن الملكية ..
🏛وجوّه المقصورة تحس إنك دخلت قصر ملكي مصغّر فيه :
صالونات فخمة ، قاعة مائدة ، مطبخ لإعداد المشروبات، وشرفة ملكية بتطل مباشرة على أرض الملعب..و متصلة بسلالم داخلية تنزّل على قلب الاستاد نفسه.
🏛وجواها هتلاقي:
▪️ وثائق وصور نادرة.
▪️ جوازات سفر شخصية لأفراد العائلة الملكية .
▪️ تحف وأثاث فاخر، أزرار ونياشين.
▪️ كؤوس، ميداليات، وإهداءات من رياضيين وهيئات دولية.
🏛المكان ده شهد وجود الملك فؤاد الأول وبعده الملك فاروق الأول ..وهو المقر الرسمي لمتابعة المباريات والاحتفالات الكبرى.
وشهد كمان لحظة سياسية فارقة..
لما وقف جمال عبد الناصر وأعلن من داخله قانون الاشتراكية سنة 1964 ..فبقت المقصورة شاهد على تاريخ رياضي… وسياسي… في نفس الوقت.

👈 واللي ناس كتير ما تعرفوش؟⁉️
إن الاستاد نفسه بيضم أثرًا إسلاميًا يرجع للقرن الرابع عشر ..بوابة الزهري و هى جزء من سور الإسكندرية القديم..وده يخلي استاد الإسكندرية الوحيد في العالم ..اللي جوّاه أثر تاريخي بالعُمق ده.
👈زيارة المقصورة الملكية مش جولة عادية…
دي رحلة بين زمن الملوك ..وتاريخ مدينة
كل حجر فيها له حكاية.
وتفضل إسكندرية دايمًا…مدينة لما تحكي
تحكي من قلب الحضارة و التاريخ .
و بكدا خلصت حكاية النهاردة..
و استنونا دايما فى حكايات وقصص مميزة عن اسكندرية و تراثها 🙋‍

الجولة كانت ممتعة جدًا، شملت الإستاد، المقصورة الملكية وغرف اللاعبين. أستاذة عزة أضافت قيمة كبيرة للمكان بشرحها لتاريخ الإستاد وسيرة الإسكندرية، خاصة قصة إنشائه في عهد الملك والمراحل اللي مر بها. تجربة مميزة وأنصح بها.