شركة التأمين المصرية السعودية

تجربتي مع شركة تأمين سيارات بيت التأمين المصري السعودي
اشتريت عربية ام جي .. استلمتها من التوكيل يوم 12 يناير 2021 ورشحولي للأسف الشركة السيئة دي عشان لو هأمن.. تعاقدت معاهم ودفعت مقدما لفترة سنة من ١٤ يناير ٢٠٢١ الى ١٤ يناير ٢٠٢٢ .. حصل حادث في شنطة العربية في نصف ديسمبر2021.. اخطرت شركة التأمين وسمحت الشركة للتوكيل بالتصليح بعد موافقتها عالمقايسة(بثمن١٠٤٠٠ج).. وأكدولي انهم هيدفعولي شيك التعويض بعد فقط اسبوعين من تسليمهم الوصل الي دفعته. سلمت الوصل يوم ١٢ يناير ٢٠٢٢.. رفضو تسليمي شيك التعويض
.
الحجة او سبب الرفض: ‘ العربية وقت التعاقد كانت مستعملة لمدة يوم ومش جديدة زي ما مكتوب في بيانات طلب التأمين المقدمة من التوكيل او الوسيط!! ودا لان تحرير رخصة العربية يوم ١٣ يناير٢٠٢١ وتاريخ وثيقة التأمين ١٤ يناير٢٠٢١’.!!
روحت للفرع الرئيسي في الدقي وتكلمت مع مدير الادارة واسمه مؤمن.. بيتكلم ان طلب التأمين المؤرخ 14يناير مكتوب غير مرخصة ..وانا مرخص العربية 13 يناير2021.. وان اي معلومات خاطئة في الطلب من العميل او من ينوب عنه يسقط حقك في التعويض.
الحقيقة بقا والي حصل اني مقدمتش اي ورق طلب تأمين وموقعتش على اي ورقة فيها بيانات خاطئة.. انا ببساطة دفعت للشركة واستلمت الوصل وراجعته وبيانات الوصل صحيحة .. هما تواصلو مباشرة مع التوكيل لأخذ باقي البيانات (تاريخ الاستلام ورقم الشاسيه وهكذا) ..وبدل مايكتبو تاريخ الطلب زي تاريخ الاستلام كتبوها بعد تاريخ الرخصة..
شوفت ورقة الطلب الي عندهم .. مقدمها وسيط اسمه شركة فيوتشر للوساطة التأمينية .. طبعا انا موكلتهمش ولا تربطني بيهم اي اوراق..
اسئلة كتير هنا مالقتلاهاش اجابة.. ايه لازمة الوسيط ويتكلمو بإسمي ليه مادام انا موكلتهمش.. طيب موريتونيش الطلب ليه اراجعه واوقع عليه؟؟هراجع ازاي انا ورقة تعمدتم اخفائها؟ طيب مراجعتوش التواريخ من بدري ليه قبل الحادث؟
لكن السؤال الاهم:
هوة في اصلا بند في العقد يمنع تأمين السيارات المستعملة.؟اكيد لا طب ما تعتبروها مستعملة؟
كان رده ‘انها لو مستعملة لازم نعاين واحنا معايناش لاننا فاكرينه جديد ..واحنا مش بنعاين الجديد.
سألته ليه مش بتعاينو الجديد قال لي:
‘لان الجديد بيتعاين فعلا في فحص المرور’.!!!
طب ما انا فحصت اليوم الي قبله فعلا!!
وليه اتحمل قرارات داخلية للشركة (من عدم معاينة الجديد) .. انا ملتزم بقرارات الشركة في العقد معايا بس.
اتأكدت ان دا تحايل وتهرب من دفع التعويض.
.. قال لي:
ارجع للتوكيل او الوسيط خليهم يبعتو ورقة تفسير انهم اخطأو في التاريخ وان الطلب كان المفروض ١٢ يناير بدل ١٤.
ومع تأكدي انها جملة عشان امشي من قصاده.. كلمت التوكيل.. بعتلي رقم وسيط التأمين واسمه طارق الصاوي .. وعد بحل الموضوع وبعدين قطع ودانه مني.. روحت لفرع شركة فيوتشر في الدقي .. المدير وعد برده ونفض.. التوكيل .. نفس القصة.. محدش بقا يرد عليا .. روحت شركة التأمين 3 مرات.. ومع المحايلة بين كل الاطراف و موصلتش لحاجة.
الشركة بتعاقب العميل على ورقة هما الي عاملينها ومخبينها لوقت العوزة.
وحتى لو بيانات الورقة فيها مشكلة تمنع التأمين .. يرجعلي فلوس وصل التأمين الي دفعته مقدما 6800ج… مادام محصلش تأمين اصلا… انما ياخد فلوس التأمين على انه مأمن وفي نفس الوقت ياخد فلوس التعويض على اساس انه مش مأمن فدا النصب بعينه.

من أفضل شركات التأمين على مستوى مصر والعالم من سهولة التعامل والإجراءات وموظفين على مستوى عالى من الوعى بعملهم ومصداقيه فى التعويض والمواعيد المحددة لكل شئ فعلا بيت التأمين المصرى السعودى هو بيتى وفى ظل انتشار فيروس كورونا يقوم أحد الموظفين بإستقبالك ويقوم بإجراء اختبار درجة الحرارة الإطمئنان عليك شكرا بيت التأمين المصرى السعودى