معالجة نفسية

الشغل بتاعهم بعد شهر كأنه متعملش والمبلغ تلات أضعاف اللي بيدفع في اي حته .. منصحش بيها شغلها كله غش

عملت تريتمنت عند ثيرابيستا بهدف ان كسرة شعري تقل اول مرة كان أول السنة والدنيا كانت تمام تاني مرة كان من ٣ شهور عملت الجذور فقط ب٤٢٥٠ جنيه وده رقم كبير مقارنة بباقي الأماكن علي انه جذور بس مش شعر كامل
وبعدها بشهر بالظبط شعري رجع!!! وهما علي كلامهم التريتيمنت بيبدأ ينزل من الشعر بعد ٤٠ غسلة يعني حوالي ٤ ٥ شهور طبعا مفيش الكلام ده شهر ولقيت الكسرة موجودة بقوة !! وطبعا كان ممكن أقول مكان معندوش ضمير وخلاص بس انا. جربته اوريدي اول السنة وعارفه النتيجة بتاعتهم فكنت متأكدة ان في حاجة غلط المرة دي
ومفروض اني بستعمل من عندهم شامبو وبلسم وحمام كريم يعمي ماشية علي الروتين بتاعهم بالملل …
روحتلهم قالولي شعرك ملقطش!! هنعمل إعادة عملوا اعادة مش كامله لان التريتمنت الاساسي بيعملوه علي ٣ مرات بين كل مرة والتانيه أسبوعين هما عملوه مرة واحدة فقط وبعدها شهر جيس وات؟ الشعر رجع زي ماهو لتاني مرة!! طبعا علي ما احجز معاد واروح فيها أسبوعين روحلتهم تاني قعدت تقول شعرك جزء منه طول وجزء منه التريتمنت وقع منه طيب ايه الحل في الجزء اللي نزل منه ده؟؟ ممكن نعمل الجذور تاني بتكلفة ٤٢٠٠ جنيه !!! طب ليه انا اتحمل تكلفة حاجة انتوا نفسكوا بتقولوا انه نزل من الشعر؟ وليه تقولوا بينزل بعد ٤٠ غسلة والحقيقة انه اقل من كده بكتير؟ وليه اسعاركوا اوفر وانتوا من ناحية المعاملة مش مختلفين كتير عن الأماكن التانية؟
ولما لاقوني مصدومة قالولي تمام ممكن نعمل خصم ٢٠% !! تعملولي انا الخصم؟ هي مش مشكلتي اصلا ومش مسؤوليتي انا دفعت المبلغ كامل اول مرة لو هو نزل من الشعر فدي مسؤوليتكوا انتوا ومشكلتكوا انتوا مش انا يعني ياما المشكلة في الماتريال او في شغلكوا نفسه او كلامكوا!!
وهما بردو عندهم نغمة احنا مش بنفرد فرد كامل احنا بنعالج طيب لما الشعر يرجع بعد شهر بالمنظر ده ايه اللي هيحصل بعد ٤٠ غسلة؟ لو اللي حصل ده وضع طبيعي يعني؟
حاجة تانية جانبية بس مهمه جدا عندي
إحترام المواعيد عندهم في ذمة الله 🙂
انت حاجز من أسبوعين صح؟ عشان فيه ضغط اليومين دول
تمام لما توصل هتستني ٣ ساعات لحد ما الدكتورة توصل بالسلامة 🙂 هما مديني معاد الساعه ١ الدكتور وصلت المكان الساعه ٤ 🙂
انا طبعا مش هتعامل معاهم تاني بس قولت أبلغ باللي حصل لاني بسمع عندهم أرقام عجيبة ٧ آلاف و٩ آلاف لو حد بيعمل شعر كامل مش جذور فبعد المبلغ ده كله تكون مشكلة العميل ان شعره ملقطش