مكتب صحة المعادى

الناس ذوق وكويسين بس الركنة صعبة. جدا

بالنسبة لمصل الالتهاب السحائي المطلوب للعمرة و الحج
الساعة ٨ الصبح تقريبًا بيجمعوا الاسماء في ورقة و تتسلم للتمريض
في ورقة بيانات موجودة في المكتبة بره خالص على يمين اللي داخل المكتب ، بنملاها و تتقدم مع الورق التالي
مطلوب صورة بطاقة و صورة باسبور و صورة شخصية و ٨٠٠ لمصل الالتهاب السحائي فقط
و لو هنزود مصل الانفلونزا هيبقى كله ١٠٦٠ و يكونوا فكة و مظبوطين
الدور بيغيب شوية
بعد ما تاخد المصل هتاخد الشهادة و ايصال الدفع و بتختم من مكتب المدير
بيقفلوا الساعة ٢

أحيانًا لما بيخلصوا الورقة المُسجل فيها الأدوار.. بياخدوا ورقة تانية للناس اللي جت بعدهم ،، فلما تروح سجل اسمك في ورقة جديدة حتى بعد الاولى ما تتقدم و ممكن تدخل و ممكن لأ

قريب من محطة مترو المعادى تقريبا عشر دقائق مشي والشوارع نظيفة وفيها زرع كتير تحب تمشي فيها وهى منطقة حيوية وأمان تمشي فيها .
كنت جاية اتجاه حلوان من محطة السادات ولما نزلت المعادى خرجت من بوابة الخروج نفس الاتجاه وممكن تسألوا على عزبة نافع بس انا مشيت على ال GBS وخليته مشي ووصلت بسهولة جدا.
لما وصلت كانت الساعة ٨ الصبح وكنت رقم ١٢ يعنى لما تروحوا بدرى بتدخلوا بسرعة وتروحوا بدرى ده رأيي الشخصى .
فى ورقة بنكتب فيها الاسماء بالترتيب وتقدر تقعد فى اى مكان لحد ٩ ونص هما بيبدأو يدخلوا اول ١٠ وفى قهوة جمب المكتب على طول وفى سوبر ماركت .
وتقدر تروح بعربيتك هتلاقى ركنة بس مش كتير ولازم تكون رايح بدرى عشان تلاقى اول ما بندخل بياخدوا البطاقة ويتأكدوا انك متوجه لمكتب صحة المعادى مش حاجة تانية وهما منظمين جدا ومتعاونين مع الناس الحقيقة جدا .
كان من شهر موجود استرازينكا وفايزر لما روحت امبارح كان موجود فايزر بس وبيسألوا لو فى اكتر من نوع تحب تاخد انهى نوع .
واول جرعة محستش بوجع الإبرة خالص لكن الجرعة التانية الممرضة كانت مختلفة حسيت بوجع بس مش عارفة ده سببه ايه بس الحمد لله عدت على خير .
ولما بناخد الجرعة التانية بنختم الورقة اللى معانا اللى خدناها فى الجرعة الأولى إثبات أننا أخدنا الجرعتين لو حد عايز يعمل ال QR code بيدخل مكتب تاني وبيشوف الباسبور والتأشيرة وعلى حسب لو سياحة بتكون اكتر من ٢٥٠ جنيه .
فى أماكن انتظار جوه المكتب تقدر تقعد ترتاح فيها وفى حمام هناك والمكتب من جوه نظيف وواسع .
السيدات ياريت تكونوا لابسين حاجة نص كم وفوقيها جاكت أو كارديجان بحيث متاخدوش وقت لما تدخلوا تاخدوا اللقاح عشان توفرى على نفسك وقت ومجهود وتكونى لابسه حاجة واسعة عشان متحسيش بوجع مكان الحقنة وكمان توفرى على الممرضة وقت لان دى حاجة بتعطلهم جامد .
سلبيات المكان إن قدام المكتب من بره للاسف فى ذباب كتير اوى بسبب قلة النظافة فى المكان ده .
بس شايفة إن المكتب منظم جدا بس ياريت الناس تساعدهم لان الناس بتفضل واقفة قدام الباب بشكل غريب فى حين لو وقفنا بعيد عن الباب الموظفين هيكونوا مرتاحين اكتر ويعرفوا يساعدوكم وتسمعوا كويس هما بيقولوا ايه او بيندهوا على مين بلاش تكدس .
وكمان فى تطعيم الأطفال دول ملهمش ترتيب بيدخلوا على طول ياريت نديهم مساحة يدخلوا ويخرجوا براحتهم .