هَكوهِ جِهير

منتهي قلة الذوق اللي في الدنيا روحت المكان قبل ماتش مصر و ايران بخمس ساعات و كان في ترابيزات فاضيه قالي محجوزه و مرضيش يشوفلي ترابيزه و قالي احجز قبلها بيوم و لا اتنين جيت احجز دلوقتي لماتش مصر الجاي اتقالي مفيش حجز ! اصدق مين دلوقتي

مكان جميل وهادئ، الجلسة مريحة وتحس كأنك رجعت بالزمن. التجربة لطيفة والشيشه ممتازه. ملاحظة: الدفع كاش فقط.

بص ياسيدي
صلي علي النبي
كمان زيد النبي صلاة
المكان دة اول مرة اروحه
الحقيقه ان وشي في الصور مبين قد ايه انبساطي من المكان
المميزات :
العنوان سهل جدا علي جوجل ميدان الإسماعيلية مصر الجديدة
استاف مؤدب محترم تم اختيارة بعنايه ولابس يونيفورم شيك نضيف
مشروبات السخن ممتازة ونضيفه وطعمها كويس
مشروبات ساقعه وعصاير معرفش لاني مجربتهاش
قعدة مريحه جدا تفكرك وتحببك في مصر اقسم بالله اكتر مااحنا بنحبها
صوت فيروز وأغاني فيروز وأم كلثوم جو تاني خااالص من الصبح لحد ادان العصر وبعد العصر اغاني بايقاع سريع لنانسي وتامر وراغب وعمرو
وانت قاعد بقي برة شجر قدامك وصوت عصافير حاجه عظمه
المنيو مطبوع عليها صورة ام كلثوم زي ماموجود بالصور
لفت نظرى جدا أن كنك القهوة والشيش والمعالق كلها لونها نحاس ف بيدي شكل جميل
الحمامات رجالي وحريمي نضيفه بس فيه احسن
ممكن تقعد جوة او برة عادي مكان عائلي هات مراتك خطيبتك زميلتك هتتبسط
الأهم بقي الأسعار هايله جدا بالنسبه لأسعار مصر الجديدة يعني قهوة فرنساوي ب ٣٩ جنيه ونسكافيه تقريبا ٤٥ جنيه
عندك كمان حته محل فول وطعمية ع الصف التاني عائلي مليان عائلات تاخد فطارك الجميل احلي اصطباحه
العيوب بقي
مفيش ركنه للعربيه غير بعيييييييد إنما لو راكب اسكوتر او جي مواصلات تمام
عندك الحمامات ممكن يتروق عليها اكتر من كدة
وكمان المكان يعتبر صغير شويه وعدد الناس اللي قعدة ماشالله كتير ف الترابيزات قريبه من بعض وبالتالي مساحه الخصوصيه مش احسن حاجه وعشان كدة انصح جدا بزيارة المكان صباحا مش مساءا
ملحوظه : تبقي امك دعيالك لو عرفت تقعد ع الكنبه اللي في نص المكان برة لانها مخصصه فقط لصاحب القهوة ودايما مكتوب عليها محجوز إنما العبد لله كان محظوظ وقعد عليها . كنبه بقي متبطنه واخر راحه بتخليك مش عاوز تقوم تمشي مش زي بقيه الكراسي البلاستيك السودة
وبس خلاص
شكرا ليكم وربنا يسعد اوقاتكم