منتجع سفير مرسى مطروح

مبدئيا أنا راضي عن الفندق و الاجازه لكن طبعا فيه كتير من التفاصيل أولا علشان نساعد الناس اللي حتيجي ثانيا علشان تحسين الخدمه .
أولا الناس اللي أول مره تزور مطروح الفندق في طريق كليوباترا/ الغرام على بعد ٤ كيلو من الطريق الرئيسي و ده اقرب ماكان لو عايز تشتري حاجه ، أو تحرص على إنك تجيب احتياجاتك لو مش ناوي تخرج من الفندق أو ما معكش عربيه مثلا .
مطروح فيها أماكن كتير للزياره و الاستمتاع و التصوير اعتقد لو عايز ترتب رحله ممكن الفندق يساعدك و لو اني ما جربتش لإني معايا عربيه و لو الفندق مش بيساعد ياريت يحرصوا على كده .
الفندق في الصور على بوكينج و جوجل ماب هو المبنى القديم أو كما بيطلقوا عليه سفير ١ إنما فيه مبنى جديد اكبر سفير ٢ ملاصق للمبنى الاول بحمام سباحه اكبر و هو اللي فيه المطعم موجود على جوجل ماب تحت اسم فندق كليوباترا تحت الإنشاء انما فعليا هو شغال من زمان .
اقامتي كانت في المبنى القديم ، غرف جميله و واسعه طبعا لو في الدور التالت مواجه للبحر حتشوف احلى فيو .
النظافه معقوله و الفرش ممتاز باستثناء الملايات .. قديمه و فيها وبر مخليها زي السنفره انا اشتكيت بعد اول ليله و غيروا الملايات لكن برضه فيها وبر لكن اخف شويه واضح انهم لازم يغيروا الملايات .
المبنى الجديد غرفه كتير و عندي احساس ان غرفه اصغر لكني ما دخلتهاش علشان أاكد المعلومه .
لو انت ما تعرفش مطروح فهي عايشه على عربيات المياه و الخزانات الارضيه و العلويه .
طبعا مسأله الخزانات محتاجه صيانه دوريه للتنظيف و الكلام ده المفروض يتعمل كل سنه على الاقل بشركه تنظيف خزانات متخصصه و لو كان اتعمل ما كناش لقينا المياه في الحمام لونها اصفر و ده شى واضح جدا و لازم يكون له حل لاننا في الحقيقه بنستحمى بمياه فيها لون الله اعلم ده صدأ و لا أيه .
الشاطى بصفه عامه جميل و مناسب للعائلات و الاطفال و شاطئ كليوباترا معروف انه لاجون يعني مافيش امواج ..
تجهيزات الشاطئ من شماسي و شازلونج ممتازه .. لكن البحر في شاطئ المبنى الجديد فيه مخلفات بناء يعني انا لقيت طوب و كسر سيراميك و محتاج نظافه و انا متأكد ان ده مش مستحيل .. و علشان كده كنت باقعد على طول في شاطئ المبنى القديم و لو ان حمام السباحه الرئيسي و كل الاجواء موجوده عند المبنى الجديد ..
بالنسبه للاكل و انا حاتكلم عن الفطار و العشاء لاني كنت حاجز هاف بورد ماكينه قهوه واحده تخدم النزلاء ده بيسبب زحمه و طابور طويل و ضغط على الماكينه محتاجه حد جنبها بقى يزود لبن و قهوه و ميه .
بصفه عامه بوفيه السلطات و المخبوزات و الحلويات ممتاز .
في الفطار موجود فول ممتاز و طعميه تحس انها بايته و مكتومه و اسوأ أنواع الجبن الرومي و الشيدر .
طبعا شيف البيض اللي هم ٢ مش واحد و مع ذلك فيه طابور طويل و فيه ممارسه بنشوفها بقالنا شويه في بعض الفنادق و هو الاومليت المجهز مسبقا .. بيض مضروب و الشيف بياخد منه كميه للنزيل .. الحقيقه ان الممارسه دي ليها شروط علشان تبقى صحيه ، تستخدم بيض سائل مبستر و ده غالي أو تجهز انت البيض و تحطه في تلاجه جنبك درجه حرارتها اقل من ٥ درجات او تحط الوعاء فوق تلج انما اطباق على رخامه المطبخ دة يسبب تلوث البيض و الحقيقه اني ما كنتش باقرب من بوفيه البيض و باتجاهل الممارسه دي لانها بالنسبه لي مقززه .
سالت مره ايه انواع البطاطس الغريبه اللي بتحطوها في الفطار و هي مثلا في يوم كانت بطاطس مطبوخه بالبصل (عالفطار )و سألت ما تقلوا بطاطس يا جماعه عادي قالولي البطاطس المقليه في الغدا و السناكس للناس الاول انكلوسيف … يعني هاف بورد ممنوع عنك البطاطس المقليه و ده منطق غريب .
طبعا بلاش نتكلم عن العصير اللي في الفطار اللي هو مشروب تانج مره خفيف و مره تقيل اهو اي حاجه ملونه بسكر و خلاص .. طبعا زعلت على ايام سفير دهب اللي المشروبات عندهم كانت عصير طبيعي و كركديه و ساعات تمر هندي .
العشا رز ابيض صنف لحمه بنفس اللا طعم و الشكل و نوع فراخ و سمك فيليه مقلي طبعا و اخر يوم كان كاليماري و اليوم اللي اتعمل لازانيا اتعملت بالكاليماري و مش عايز اقول للشيف فيه كام طريقه تعمل بيها الارز بدل رز المستشفيات الابيض و اللي لونه ابيض بطريقه مش طبيعيه طبعا فيه صنف خضار . و اصدقكم القول اني بعد اول يوم كان اكلي في العشا مكرونه من اللايف كوكينج و سلطات و لو فيه فراخ بتتشوي او كفته و ده مش كل يوم .
الحياه بالليل عادي بقى ديسكو الاطفال و بس على كده ..
قعدت ٥ ليالي ليله كان فيها راقصه و ليله فاير شو .
كان فيه مباريات كاس العالم و للاسف الفندق ما فيهوش اشتراك بي ان سبورت (عيب قوي) …مافيش غير تليفزيون في كافيتريا المبنى القديم عليه ريسيفر من ابو ٣٠٠ جنيه اللي باشتراك اي بي تي في مجانا .. تشوف الشوط الاول و تروح و من ستر ربنا ان ماتش مصر كان مش مشفر و الا كانت حتبقى مشكله كبيره في الفندق يوم ماتش فرنسا و المغرب الريسيفر حلف إنه مش شغال طلعت الاوضه و اتفرجت عالموبايل

هو فندق تحفه من كله
الاكل ايام تحفه ايام متوسط اليوم الاورينتال عجبني العشا موت
المكان روعه كانك في شرم
مفيش بحر ده لاجون يعني اللي غاوي بحر هيتضايق اَو هيضطر يروح بحر بره… انا بحب اللجون عادي فمضايقتش انما ناس كتير خرجت راحت بحر
مليان الفندق اجانب فلبسهم بكيني عشان لو حد هيتضايق من ده ميروحش
تصرفات الاجانب فيها تلامس مش لطيف منصحش اطفال تشوف ده ولا كبار ولا اي شخص بس لو متعودين تروحوا فنادق فيها اجانب تمام غير كده بلاش…

تجربه اكيد اكييد بإذن الله هنكررها تاني وزعلانه اننا مشينا من المكان بجد ..كل حاجه فيه كانت اعلى من توقعاتنا
من اول نضافة المكان والابتسامه الجميله اللى على وشوش كل اللي فيه لنضافة الاوض والشط والاكل في حته تانيه لوحده تسلم ايد الشيف
ومره تانيه وتالته شكراً لكل العاملين فى المكان احنا تعبناهم جدا وهما كانوا قمة الود واللطف و professional لأبعد حد بجد
شكراً جدا ❤️